Fatima Mernissi

Fez, Maroko, 1940 ‒ Rabat, Maroko, 2015
Marokoar idazlea, historialaria, soziologoa eta unibertsitateko irakaslea. Rabaten Zientzia Politikoak ikasi ostean, Parisko Sorbonako Unibertsitatearen beka bat jaso zuen, Brandeis Unibertsitatean (AEB) soziologiako doktoregoa egiteko.
Saiakera, azterlan, artikulu eta askotariko idatziak utzi ditu, hainbat hizkuntzatara itzuli direnak. Emakumeen eskubideak defendatzeagatik eta Koranean mundu mailako aditua izateagatik nabarmendu zen, besteak beste, eta, bere lanetan, emakumeak islamean historikoki bete duen lekua eta gaur egun betetzen duena aztertu zituen, Profetak sexuen berdintasuna defendatu zuela aldarrikatu zuen, edota, marokoar emakume ugari elkarrizketatu ondoren, emakumeen alfabetatzearen eta jaiotza-indizearen arteko korrelazioa frogatu zuen zientifikoki.
Eleberri bakarra idatzi zuen, Dreams of Trespass, hainbat hizkuntzatara itzuli dena munduan zehar eta Terraza debekatua izenburuarekin hemen argitara ematen duguna. Estilo autobiografikoan idatzita badago ere, fikzioa zela esan izan zuen beti Fatima Mernissik, errealitatean inspiratutako eleberria, baina ez errealitatearen deskribapena.