Fiodor Dostoievski

Fiodor Mikhailovitx Dostoievski 
Mosku, 1821 – San Petersburgo, 1881 
Errusiar idazlea izan zen. Haurtzaroa familiagiro zurrunean igarota, San Petersburgon egin zituen ikasketak, eta han hasi zuen bere ibilbidea idazle gisa. Lehenbiziko idazlanekin arrakasta koxkor bat lortu orduko, atxilotu egin zuten jarduera iraultzaileak egotzita, eta heriotza zigorrera kondenatu. Azkeneko momentuan libratu zen exekuziotik, eta, ordainetan, hainbat urte igaro behar izan zituen gatibu-lanetan, Siberian. Anaiaren, lehenbiziko emaztearen, eta bi seme-alaben galerak nozitu zituen. Osasun arazoengatik ere sufritu zuen, epilepsia-atakeak izaten baitzituen. Jokoaren mende erori eta dena galdu zuen, behin baino gehiagotan. Zorrek eta hartzekodunek presionatuta, denboraren kontra idatzi zituen lanik gehienak, «izpirituzko lasaitasunik gabe», berak esan bezala. Hala ere, errusiar literaturaren gailurtzat hartzen diren zenbait obra goren utzi zituen idatzirik, hala nola, Krimena eta zigorra (1866), Ergela (1868) eta Karamazov anaiak (1880). Euskaraz irakur daitezke Jokalaria (1866) eta Lurpeko ezkutuan idatziak (1864).