Felipe Juaristi

Felipe Juaristi Galdos, Azkoitian jaioa da, 1957an. Kazetaritza ikasketak egin zituen Madrilen, eta lanbide horretan aritu da, euskaraz zein gaztelaniaz, hainbat lekutan: Literatur Gazeta eta Porrot aldizkarien sortzaileetakoa da. Poeta gisa da batez ere ezaguna. Juaristiren lehen poema-bilduma Denbora, nostalgia (Baroja, 1985) izan zen. Geroztik, Hiriaren melankolia (Baroja, 1987), Laino artean zelatari (Alberdania, 1993) Galderen geografia (Alberdania, 1997), Begi-ikarak (Erein, 2004) argitaratu ditu. Hiz-lauzko lanik ere badu: Intzentsua lurrean bezala (Baroja, 1988) kontakizuna,  Arinago duk haizea, Absalon (Erein, 1990) eta Ez da gaua begietara etortzen (erein, 2007) eleberriak. Haur eta gazte literaturari ere hainbat liburu eman dizkio: Tristuraren teoria (Erein, 1993), Ilargi-lapurra (Erein, 1994), Sagitario (Descleé de Brouwer, 1995), Eguzkiaren Etxea (Alberdania, 1998), Laura eta Itxasoa (Aizkorri, 1998), Aduna eta aduanak (Erein, 2000) eta Zazpi bider zazpi (Erein, 2005). Hainbat sari jasotakoa da Felipe Juaristi: 1992ko Lizardi Saria, Tristuraren teoria izeneko lanarekin. 1998an Euskadi literatura saria jasoa, euskarazko literaturari dagokiona, bere Galderen geografia izeneko olerki liburuagatik. Liburu horrek badu dagoeneko gaztelaniazko bertsioa: Geografía de las Preguntas (Bassarai, 1999).