J. Sheridan Le Fanu

Joseph Thomas Sheridan Le Fanu Dublinen sortu zen, 1814. urtean, eta jaioterrian bertan hil, 1873an. Zuzenbidea ikasi zuen, Trinity Collegen. Gero, zenbait literatur aldizkaritan aritu zen lanean, bai kazetari, artikuluak-eta idatziz, bai idazle, berak asmatutako istorioak argitaratuz. Kontakizun laburrak ez ezik, nobela batzuk ere ondu zituen, terrorezko eta misteriozko istorio gotikoak gehienak. Lan haietako batzuk batu egin zituen ondoren, eta liburu gisa plazaratu. In a Glass Darkly izenekoa da, hain zuzen, bilduma horietan ospetsuena, eta bost narrazio bildu zituen bertan, tartean Carmilla bera, Le Fanuren obrarik ezagunena eta geroko banpiro-istorio ezagun askoren oinarria izango zena.