Yoyes Bere leihotik

Yoyes, Maria Dolores Gonzalez Katarain (Ordizia, 1954-1986), ETAko kide izan zen 1970eko hamarkadaren hasieratik 1979ra arte. Tartean, 1973an, Ipar Euskal Herrira erbesteratu zen.

Yoyesek ETAko militantzia sakoneraino bizi izan zuen eta ardura postuak bete zituen lehen emakumeetako bat izan zen.
1979an ETA utzi, eta 1980ko hasieran Mexikon finkatu zen. Han, Soziologian lizentziatu zen eta Nazio Batuen Erakundeko Foro del Desarrollo aldizkarian aritu zen lanean.

1985eko urrian itzuli zen Euskal Herrira, 1977ko amnistia legeaz baliatuta.

1986ko irailaren 10ean bere herrian, Ordizian, erail zuen ETAk -hiru urteko semearen aurrean- Euskal Herriarekiko traizioa leporatuta.

Liburu honetan, Yoyesen idatzi pertsonalak dira nagusi, 1971n hasi eta 1986 bitartean eginak, Ordizian, Ipar Euskal Herrian, Mexikon, Parisen, Biarritzen, Donostian… eguneroko baten moduan.

Ez daude idatzi guztiak, bai esanguratsuenak. Tarteka, poesiara jotzen du Yoyesek bere sentipenak adierazteko.